جھانوی کپور اور سدھارتھ ملہوترا کی رومانوی فلم کی ریلیز کا اعلان کر دیا گیا

سوشل میڈیا پر فلم کا پہلا پوسٹر بھی جاری کر دیا گیا ہے جس میں جھانوی کپور کو ’سندری‘ کے کردار میں متعارف کرایا گیا ہے۔ جاری کیے گئے پوسٹر میں وہ سرخ کرتا، زمردی بالیاں، بندیا اور گجرا پہنے ساحل کے قریب بیٹھی دکھائی دیں۔ ان کے پوسٹر کے کیپشن میں لکھا  ہے کہ ’جھانوی کپور کو  ساؤتھ کی سندری کے طور پر پیش کر رہے ہیں، جو اپنی دلکشی اور خوبصورتی سے دلوں کو پگھلا دیں گی۔‘

دوسری جانب سدھارتھ ملہوترا کو ’پرم‘ کے کردار میں پیش کیا گیا ہے۔ انہیں پوسٹر میں سفید ٹی شرٹ، ڈینم جیکٹ پہنے دکھایا گیا جبکہ انہوں نے کالے رنگ کا چشمہ بھی لگا رکھا ہے۔ پوسٹ کے کیپشن میں لکھا تھا ’سدھارتھ ملہوترا بطور نارتھ کا مُنڈا پرم دل جیتنے آ رہے ہیں‘۔

واضح رہے کہ فلم ’پرم سندری‘ تشار جلوٹا کی ہدایت کاری میں بنائی گئی ہے اور یہ ایک کراس کلچرل رومانوی کہانی ہے۔ دونوں اداکاروں کے مداح اس نئی جوڑی اور  فلم کہانی کے منتظر ہیں اور ایک بلاک بسٹر رومانوی کامیڈی فلم کی توقع کر رہے ہیں۔