کراچی؛ ٹریفک پولیس اہلکار اور شہری گتھم گتھا، ویڈیو وائرل

پی آئی ڈی سی چوک پر ٹریفک پولیس اہلکار اور شہری گتھم گتھا ہوگئے، واقعے کی موبائل فون سے بنائی گئی ویڈیو سوشل میڈیا پر وائرل ہوگئی۔ 

 اس حوالے سے سیکشن آفیسر (ایس او) پی آئی ڈی سی ٹریفک پولیس چوکی سرفراز سیال نے بتایا کہ شہری کی جانب سے سگنل کی خلاف ورزی کی گئی تھی جس پر ڈیوٹی پر موجود پولیس افسر نے شہری کو خلاف ورزی کا بتایا تو وہ طیش میں آگیا۔ 

اس دوران شہری نے ٹریفک پولیس اہلکاروں سے بدتمیزی اور گالم گلوچ کرتے ہوئے ہاتھا پائی کی اور پولیس اہلکار کے گریبان پر ہاتھ ڈال کر اس کی وردی بھی پھاڑ دی تاہم موقع پر موجود دیگر پولیس اہلکاروں نے مشتعل شہری کو قابو کر کے اس کا سگنل کی خلاف ورزی کے الزام میں چالان کر دیا۔

 ایک سوال کے جواب میں انھوں ںے بتایا کہ شہری کے خلاف صرف چالان کر کے جرمانہ عائد کیا گیا ہے اس کے خلاف دیگر کوئی قانونی کارروائی (ایف آئی آر) نہیں کی گئی ۔