سرکاری اسپتال کے باتھ روم میں بچے کی پیدائش
خاتون گائنی آؤٹ ڈور میں چیک اپ کروانے آئی تھی، دونوں کی حالت خطرے سے باہر ہے، اسپتال انتظامیہ
فوٹو فائل
ملتان میں قائم سرکاری اسپتال (نشتر) میں خاتون نے بیت الخلا میں بچے کو جنم دیا ہے۔
ایکسپریس نیوز کے مطابق ملتان نشتر اسپتال میں زچگی کی شکایت کے ساتھ آئی خاتون نے واش روم میں بچے کو جنم دے دیا۔ انتظامیہ کے مطابق خاتون گائنی آؤٹ ڈور میں چیک اپ کروانے آئی تھی۔
انتظامیہ کے مطابق الٹرا ساؤنڈ کروانے کے بعد مریضہ واش روم گئی جہاں زچگی کی شدید تکلیف کے بعد بچے کو جنم دے دیا، جس پر عملے نے زچہ اور بچہ کو فوری گائنی لیبر روم منتقل کیا۔
اسپتال ذرائع کے مطابق مریضہ اور بچے کی صحت تسلی بخش ہے۔