امرودوں کی آڑ میں منشیات اسمگلنگ کی کوشش ناکام، ساڑھے 14کلو چرس برآمد
منشیات قبضے میں لے کر ملوث ملزمان کی گرفتاری کے لیے مزید تحقیقات کا آغاز کر دیا گیا
راولپنڈی:
اینٹی نارکوٹکس فورس نے موٹروے ٹول پلازہ اسلام آباد کے قریب امرودوں کی آڑ میں منشیات اسمگلنگ کی کوشش ناکام بنا دی۔
حکام کے مطابق اے این ایف نے انٹیلیجنس اطلاع پر اسلام آباد ٹول پلازہ سو کے قریب ایک مسافر بس کو روکا تو تلاشی کے دوران بس میں موجود امرود کے کریٹوں سے 14 کلو 400 گرام چرس برآمد ہوئی۔ امرود کی پیٹیاں بلال جان نامی شخص کی جانب سے کارگو کروائی گئی تھیں۔
حکام کا مزید کہنا تھا کہ منشیات قبضے میں لے کر ملوث ملزمان کی گرفتاری کے لیے مزید تحقیقات کا آغاز کر دیا گیا ہے۔