تارک مہتا کا اُلٹا چشمہ کے اداکار نے کھانا پینا کیوں چھوڑ دیا؟ دوست کا انکشاف

بھارتی ٹی وی ڈرامہ تارک مہتا کا الٹا چشمہ میں روشن سنگھ سوڈھی کا کردار ادا کرنے والے اداکار گروچرن سنگھ نے کھانا چھوڑ دیا ہے۔

کچھ دن قبل روشن سنگھ نے سوشل میڈیا پر ویڈیو پوسٹ کرتے ہوئے مداحوں کو اپنی صحت سے متعلق آگاہ کیا تھا اور بتایا تھا کہ ان کی حالت خراب ہے، جس کے بعد اب یہ خبر سامنے آئی ہے کہ وہ شدید کمزوری کا شکار ہوگئے ہیں۔

حال ہی میں انہیں ممبئی کے ایک اسپتال میں داخل کیا گیا تھا۔ گروچرن سنگھ کی دوست بھکتی سونی نے ان کی صحت اور مالی مشکلات کے بارے میں بات کرتے ہوئے بتایا کہ وہ کئی دنوں سے ان کے اور ان کے خاندان سے رابطے کی کوشش کر رہی ہیں، لیکن ان کے فون بند ہیں، اور ان کی موجودہ حالت کے بارے میں کوئی تازہ معلومات دستیاب نہیں ہیں۔

بھکتی نے مزید کہا کہ تین دن پہلے، جب گروچرن اسپتال میں تھے، تو ان کی والدہ سے بات ہوئی تھی۔ انہوں نے بتایا تھا کہ گروچرن بات کرنے کے قابل نہیں ہیں اور بہت کمزور ہیں۔ بھکتی کے مطابق، گروچرن نے تین ماہ پہلے ٹھوس غذا کھانا چھوڑ دیا تھا اور صرف مائع غذا پر گزارا کر رہے تھے۔

واضح رہے کہ کہ گروچرن سنگھ ’تارک مہتا کا الٹا چشمہ‘ میں روشن سنگھ سوڈھی کا کردار نبھاتے تھے، لیکن 2012 میں بغیر کسی پیشگی اطلاع کے انہیں شو سے ہٹا دیا گیا تھا۔

گزشتہ برس، گروچرن نے کچھ عرصے کے لیے خود ساختہ گمشدگی اختیار کر لی تھی، جسے بعد میں انہوں نے اپنی مالی مشکلات سے جوڑ دیا تھا۔