شاہزیب رند 3 بار کے عالمی چیمپئین کو شکست دیکر ٹائٹل کے دفاع میں کامیاب

پاکستانی کراٹے فائٹر شاہزیب رند نے اپنے سب سے مشکل حریف اور 3 بار کے عالمی چیمپئن ایڈگر سکرائیور کو شکست دے کر لائٹ ویٹ چیمپئین ہونے کے اعزاز کا دفاع کرنے میں کامیاب ہوگئے۔

پاکستان مکسڈ مارشل آرٹس فیڈریشن کے مطابق امریکی ریاست فلوریڈا کے شہر میامی میں منعقدہ کراٹے کمبیٹ (کے سی) 52 میں شاہزیب رند نے اپنے حریف کو صفر کے مقابلے میں 7 سے شکست دی۔

کے سی 52 فُل کنٹیکٹ پروفیشنل کراٹے لیگ ہے جو گلوبل کراٹے ایم ایم اے سیریز کا حصہ ہے جس میں سکلڈ فائٹرز بھرپور مقابلے کرتے دکھائی دیتے ہیں۔

گزشتہ اڑھائی برس کے کراٹے کمبیٹ کیریئر میں شاہزیب رند ناقابل شکست رہے اور اس دوران انہوں نے شمالی امریکا میں پیرو، وینزویلا، برازیل، فرانس اور اںڈیا کے فائٹرز کے مدمقابل اکھاڑے میں اترے۔

پاکستان مکسڈ مارشل آرٹس فیڈریشن کا کہنا ہے کہ شاہزیب رند نے ایڈگرس سکرائیورز کے مدمقابل سخت جدوجہد کے بعد فتح کے ساتھ دپنا دوسرا چیمپئن شپ ٹائٹل اپنے نام کیا ہے۔

نیویارک میں پاکستانی سفارت خانے نے بھی شاہزیب رند کو اپنے اعزاز کا دفاع کرنے پر مبارکباد دی۔