سی سی ڈی سب انسپکٹر کو شہید کرنے والا ملزم عمر خان پولیس مقابلے میں ہلاک کردیا گیا۔
ملزم عمر خان نے آج صبح سی سی ڈی سب انسپکٹر عدنان غیور کو فائرنگ کرکے شہید کردیا تھا، جس کے بعد ملزم موقع سے فرار ہوگیا تھا۔
ہلاک ملزم عمر خان پہلے بھی گرفتاری سے بچنے کے لیے سی سی ڈی کے ایک اہلکار پر فائرنگ کرکے فرار ہوچکا تھا۔ سب انسپکٹر کی شہادت کے بعد سی سی ڈی کی خصوصی ٹیمیں ملزم عمر خان کا تعاقب کررہی تھیں۔
سی سی ڈی ٹیم نے ملزم عمر خان کو راولپنڈی کے علاقے میں ٹریس کرکے ہتھیار ڈالنے کا کہا، تاہم ملزم نے ہتھیار ڈالنے کی بجائے سی سی ڈی ٹیم پر براہ راست فائرنگ شروع کردی۔ سی سی ڈی ٹیم نے بھی سیلف ڈیفنس میں فائرنگ کی، فائرنگ کے تبادلے میں خطرناک ملزم عمر خان ہلاک ہوگیا۔
ترجمان سی سی ڈی نے کہا کہ کرائم کنٹرول ڈیپارٹمنٹ اپنی جانوں کا نذرانہ پیش کرکے منظم جرائم کے خاتمے کی کوشش کررہا ہے، جرائم پیشہ افراد کی مکمل سرکوبی تک اپنی جدوجہد جاری رکھیں گے۔
دریں اثنا شہید سب انسپکٹر عدنان غیور کی نماز جنازہ پولیس لائنز ہیڈ کوارٹرز میں ادا کر دی گئی، نماز جنازہ میں آر پی او راولپنڈی بابر سرفراز الپا، کمشنر راولپنڈی سلمان غنی، سی پی او راولپنڈی حسن مشتاق سکھیرا، ڈپٹی کمشنر کیپٹن (ر) ندیم ناصر، ایس ایس پی آپریشنز،
ایس ایس پی انوسٹیگیشن ،ایس پی سیکورٹی سمیت ڈویژنل ایس پیز، ایس ڈی پی اوز اور دیگر پولیس افسران و اہلکاروں سمیت شہریوں نے کثیر تعداد میں شرکت کی۔
پولیس کے چاق و چوبند دستوں سمیت افسران و اہلکاروں نے شہید کے جسد خاکی کو سلامی پیش کی، نماز جنازہ کی ادائیگی کے بعد شہید سب انسپکٹر عدنان غیور کا جسد خاکی سرکاری اعزاز کے ساتھ ان کے آبائی علاقہ تھانہ چکلالہ روانہ کردیا گیا۔
شہید سی سی راولپنڈی میں تعینات تھے انہوں نے لواحقین میں والدہ، اہلیہ اور بچوں کو چھوڑا ہے۔
سی پی او حسن مشتاق سکھیرا نے کہا ہے کہ راولپنڈی پولیس جرائم کی روک تھام اور شہریوں کی حفاظت کے دوران کسی قربانی سے دریغ نہیں کرے گی، شہید کے لواحقین ہمیں ہر گھڑی اپنے ساتھ پائیں گے، آئی جی پنجاب کے ویژن کے مطابق شہید کے اہل خانہ کی ویلفئیر اولین ترجیح ہے۔
