طلبہ و طالبات کو میڈیکل داخلے مساوی نشستوں پر دینے کی منظوری

ملک بھرکے میڈیکل کالجوں میں طلبہ وطالبات کے لیے مساوی نشستوں کے فیصلے کی پاکستان میڈیکل اینڈ ڈینٹل کونسل کی ایگزیکٹو کمیٹی نے توثیق کردی جس کے بعد پی ایم ڈی سی نے چاروں صوبائی حکومتوں، محکمہ صحت کے حکام اور طبی کالجوں کے پرنسپلز کو مکتوب جاری کردیا ہے۔


مکتوب میں کہا گیا ہے کہ ملک بھر کے طبی کالجوں میں دیے جانیوالے داخلے پی ایم ڈی سی کی جانب سے منظور کردہ مساوی نشستوں کے مطابق دیے جائیں اور فیصلے پر عملدرآمد یقینی بنایاجائے خلاف ورزی کرنیوالے کالجوں کے خلاف پی ایم ڈی سی قانون کے تحت کارروائی عمل میں لائی جائے گی۔

پی ایم ڈی سی کی ایگزیکٹوکمیٹی کا اجلاس ہفتے کوکونسل کے صدر پروفیسر مسعود حمید خان کی سربراہی میں ہوا، اجلاس میں ملک بھرکے تمام میڈیکل اور ڈینٹل کالجوں میں طلبہ وطالبات کی نشستیں مساوی کرنے کی منظوری دی گئی، مساوی نشستیں اہلیت سے مرتب کی جائینگی۔