ورکنگ باؤنڈری پر بھارتی فوج کی پاکستانی علاقوں میں بلااشتعال فائرنگشہید شہریوں کی تعداد 8 ہوگئی
بھارتی فوج نے گزشتہ روز بھی بلااشتعال فائرنگ کی تھی ۔ فوٹو:فائل
بھارتی فوج کی جانب سے گزشتہ کئی روزسے ورکنگ باؤنڈری پر پاکستانی علاقوں میں بلااشتعال فائرنگ کا سلسلہ جاری ہے جس کے نتیجے میں شہید شہریوں کی تعداد 8 ہوگئی۔
سیالکوٹ کی ورکنگ باؤنڈری پر گزشتہ کئی روز سے بھارت کی جانب سے مسلسل جنگ بندی معاہدے کی خلاف ورزیوں کا سلسلہ جاری ہے، چارواہ اور ہرپال سیکٹر پر پاکستان کی حدود میں واقع 3 دیہات پر بھارتی فوج نے بلااشتعال فائرنگ کی جس کے نتیجے میں ایک شخص شہید جبکہ 2 زخمی ہوگئے۔ بھارتی فوج کی چپراڑ سیکٹر میں بھی فائرنگ اور گولہ باری کے نتیجے میں 2 افراد شہید اور 3 زخمی ہوئے، اسی طرح سجیت گڑہ سیکٹر میں بھی شدید فائرنگ کی گئی جہاں 3 افراد شدید زخمی ہوگئے۔ بھارتی گولہ باری کے باعث 70 ہزار سے زائد افراد متاثر ہورہے ہیں جبکہ 20 ہزار سے زائد نقل مکانی کرگئے۔ بھارتی فوج کی اشتعال انگیزی کے جواب میں پنجاب رینجرزبھی بھرپور انداز میں جواب دے رہی ہے۔
پاک فوج کے شعبہ تعلقات عامہ (آئی ایس پی آر ) کے مطابق بھارتی فورسز کی جانب سے ایک مرتبہ پھر سیالکوٹ کے قریب ورکنگ باؤنڈری پر وقفے وقفے سے بلا اشتعال فائرنگ جاری ہے جس کا بھرپورانداز میں جواب دیا جارہا ہے۔
واضح رہے کہ گزشتہ 3 روز کے دوران سیالکوٹ کی ورکنگ باؤنڈری پر بھارتی گولہ باری اور فائرنگ سے 4 شہری شہید اور 10 زخمی ہوگئے تھے، اس کےعلاوہ گولہ باری سے 10 مکانات کو بھی شدید نقصان پہنچا تھا۔