بورڈ آف گورنرز نے معین خان کو عہدے سے ہٹانے کی اجازت دیدی چیرمین پی سی بی

پاکستان کرکٹ بورڈ کے چیرمیں شہریار خان کا کہنا ہے کہ بورڈ آف گورنرز نے معین خان کی تبدیلی کی اجازت دے دی تاہم انہیں ابھی نہیں بلکہ مناسب وقت پر ہٹایا جاسکتا ہے۔

لاہور میں پاکستان اور نیوزی لینڈ سیریز کے ''لوگو'' کی تقریب رونمائی کے موقع پر میڈیا سے بات کرتے ہوئے شہریار خان کا کہنا تھا کہ کرکٹ بورڈ میں 12 سے 15 آفیشل 2،2 عہدوں پر کام کر رہے ہیں تاہم چیف سلیکٹر اور منیجر معین خان اپنی دہری ذمہ داریاں نبھاتے رہیں گے اور مناسب وقت پر ان سے ذمہ داریاں لے لی جائیں گی۔ انہوں نے کہا کہ آسٹریلیا کو ٹیسٹ میں وائٹ واش کرنے کے بعد نیوزی لینڈ کے خلاف ٹیم جیت کے تسلسل کو برقرار رکھے گی، ابھی بورڈ کی آمدنی کے بجائے ٹیم کی جیت اور ہار کو دیکھا جارہا ہے کیوں کہ ورلڈ کپ سے پہلے فتح سمیٹنا ٹیم کے لئے بہتر ہے۔