کراچی میں منگھوپیر ناردرن بائی پاس پر مبینہ پولیس مقابلے میں 2 ٹارگٹ کلرز ہلاک
ملزمان اے این پی کے رہنما ڈاکٹر زید کے قتل اور اورنگی ٹاؤن میں پولیس پر ہونے والے حملے میں بھی ملوث تھے، پولیس
ملزمان ایک شخص کی ٹارگٹ کلنگ کے لئے 2 لاکھ روپے معاوضہ لیتے تھے اور پولیس کو مختلف مقدمات میں مطلوب تھے، پولیس۔ فوٹو: فائل
منگھو پیر ناردرن بائی پاس پر ہمددرد یونی ورسٹی کے قریب مبینہ پولیس مقابلے میں 2 ٹارگٹ کلرز ہلاک ہو گئے۔
ایکسپریس نیوز کے مطابق پولیس کا کہنا ہے کہ ناردرن بائی پاس پر ہمدرد یونی ورسٹی کے قریب مقابلے میں 2 ٹارگٹ کلرز ہلاک ہو گئے۔ ملزمان کی شناخت نسیم بابر اور شاہ رخ کے ناموں سے ہوئی ہے اور ان کے قبضے سے 2 پستول اور ایک موٹر سائیکل بھی برآمد ہوئی۔
پولیس کا کہنا ہے کہ ہلاک ہونے والے ملزمان اے این پی کے رہنما ڈاکٹر زید کے قتل اور اورنگی ٹاؤن میں پولیس پر ہونے والے حملے میں بھی ملوث تھے، ملزمان ایک شخص کی ٹارگٹ کلنگ کے لئے 2 لاکھ روپے معاوضہ لیتے تھے اور پولیس کو مختلف مقدمات میں مطلوب تھے۔
واضح رہے کہ گزشتہ روز سچل ٹاؤن تھانے کی حدود میں بھی شہریوں سے لوٹ مار کرنے والے 4 ملزمان پولیس مقابلے میں ہلاک ہو گئے تھے۔