سی آئی اے اہلکار تشدد پسند نہیں بلکہ ہمارے ہیرو ہیں ڈک چینی

سابق امریکی نائب صدر ڈک چینی نے سی آئی اے پر تشدد تفتیشی طریقہ کار کا دفاع کرتے ہوئے کہا ہے کہ موقع ملے تو دوبارہ ایسا کریں گے، سی آئی اے اہلکار تشدد پسند نہیں بلکہ ہیرو ہیں۔


امریکی نائب صدر ڈک چینی نے سی آئی اے کا دفاع کرتے ہوئے میڈیا سے بات چیت میں کہا کہ ہم نے نہ صرف اسامہ بن لادن کو پکڑا بلکہ القاعدہ کے بے شمار دہشت گردوں کو بھی گرفتار کیا جو نائن الیون سانحے میں ملوث تھے، ڈک چینی کا کہنا تھا کہ القاعدہ نے جو کچھ امریکا کے ساتھ کیا وہ تشدد تھا جبکہ سی آئی اے اہلکار ہمارے ہیرو ہیں۔

سینیٹ کی انٹیلی جنس کمیٹی نے500 صفحات پر مشتمل ایک رپورٹ گزشتہ ہفتے جاری کی تھی، جس میں سی آئی اے کے طریقہ تفتیش کے بارے میں ہولناک انکشافات کیے گئے تھے، رپورٹ منظر عام پر آنے کے بعد امریکا کے حلیف اور حریف ممالک کی جانب سے شدید تنقید بھی سامنے آئی تھی۔