فیصل آباد جیل میں 2 دہشتگردوں کو 14 جنوری کو تختہ دار پر لٹکادیا جائیگا
دونوں دہشت گرد ننکانہ صاحب حملے میں ملوث تھے جن کی سزائے موت کی تاریخ انسداد دہشتگردی کی عدالت نے مقرر کی۔ فوٹو: فائل
ننکانہ صاحب حملے میں ملوث 2 دہشتگردوں کو 14 جنوری کو فیصل آباد سنٹرل جیل میں سزائے موت دی جائے گی۔
ایکسپریس نیوز کے مطابق لاہور کی انسداد دہشت گردی کی خصوصی عدالت کے جج نے دونوں دہشت گردوں کی سزائے موت کی تاریخ مقررکی۔ دونوں دہشت گردوں کی سزائےموت پرعمل درآمدکےلیے جیل سپرنٹنڈنٹ نے انسداد دہشت گردی کی خصوصی عدالت کے ایڈمنسٹریٹر جج کو درخواست بھیجی تھی جس میں مؤقف اختیار کیاگیا کہ دونوں دہشت گردوں کےٹرائل مکمل ہیں اور اپیلیں مسترد ہوچکی ہیں جنہیں تختہ دار پر لٹکانے کے احکامات جاری کیے جائیں جس پر عدالت نے تمام قانونی کارروائی مکمل ہونے پر 14 جنوری کو منطقی انجام تک پہنچانے کے احکامات جاری کردیئے۔
واضح رہے کہ دونوں دہشتگرد ننکانہ صاحب میں سکھ برادری کے گردوارے پر حملے میں ملوث تھے۔