وفاقی حکومت کا گینگ وار کے مرکزی کردار عزیر بلوچ کو فوری تحویل میں لینے کا فیصلہ

حکومت نے لیاری گینگ وار کے مرکزی کردار عزیر بلوچ کو فوری تحویل میں لینے کا فیصلہ کیا ہے جس کے لیے کارروائی کا آغاز کردیا گیا ہے۔

ایکسپریس نیوز کےمطابق وفاقی حکومت نے متحدہ عرب امارات میں گرفتار ہونے والے لیاری گینگ وار کے مرکزی کردار عزیر بلوچ کو فوری تحویل میں لینے کا فیصلہ کیا ہے جس کے لیے وزارت داخلہ نے وزارت خارجہ کو خط کے ذریعے آگاہ کرتے ہوئے ملزم کی حوالگی کے لیے کارروائی تیز کرنے کی سفارش کی ہے۔

واضح رہے کہ لیاری گینگ وار کے مرکزی کردار عزیر بلوچ کے حکومت پاکستان کی جانب سے ریڈ وارنٹ جاری کیے گئے تھے اور ملزم کی گرفتاری کے لیے انٹرپول سے رابطہ کیا گیا تھا جس کےبعد گزشتہ روز انٹرپول نے عزیر بلوچ کو نقلی نام پر دبئی سے ایران جاتےہوئے ایئرپورٹ پر گرفتار کیا تھا۔ ملزم عزیر بلوچ تاحال متحدہ عرب امارات کی حراست میں ہے جبکہ ایرانی حکومت عزیر بلوچ کو پاسپورٹ کی تحقیقات کے لیے اپنی تحویل میں لینا چاہتی ہے۔