پیپلز پارٹی نے پیٹرول بحران پر قومی اسمبلی میں تحریک التوا جمع کرادی

پاکستان پیپلز پارٹی نے قومی اسمبلی سیکرٹریٹ میں ملک میں جاری حالیہ پٹرول بحران پر تحریک التوا جمع کرادی۔


قومی اسمبلی سیکرٹریٹ میں جمع کرائی گئی تحریک التوا میں کہا گیا ہے کہ پیٹرول بحران کے باعث عوام شدید مشکلات کا شکار ہیں جب کہ حکومت کا کام عوام کو ریلیف فراہم کرنا ہوتا ہے لیکن اس بحران سے عوام کی مشکلات میں اضافہ ہوگیا ہے۔ متن میں کہا گیا ہے کہ موجودہ بحران کی ذمہ دار پٹرولیم، خزانہ اور پانی و بجلی کی وزارتیں ہیں لیکن ذمہ داروں کا تعین کئے بغیر ہی 4 افسران کو معطل کردیا گیا۔

قرارداد میں مطالبہ کیا گیا ہے کہ حکومت اس بحران کے اصل ذمہ داروں کا تعین کرکے ایوان میں وضاحت پیش کرے، اس کے علاوہ عالمی منڈیوں میں تیل کی قیمت 50ڈالر فی بیرل سے بھی کم ہوئی ہیں اس صورت حال میں حکومت پیٹرولیم مصنوعات کی قیمتوں کی مد میں عوام کو مزید ریلیف دے۔