سونیا خان اپنے شوہر کے گائے گیتوں پر ماڈلنگ کریں گی

ماضی میں پاکستانی فلموں میں مرکزی کردار اداکرنے والی اداکارہ سونیا خان نے شوبز میں واپسی کا فیصلہ کرلیا وہ جلد ہی اپنے شوہرکے گائے گیتوں پرماڈلنگ کرتی دکھائی دیں گی۔


ناروے کے مقامی اسٹوڈیو میں طارق میر نے گیت ریکارڈ کرلیے ہیں جب کہ ان گیتوں کے وڈیو شوٹ کے لیے آئندہ چند روزمیں شیڈول ترتیب دیا جائے گا۔ جب اس سلسلہ میں سونیا خان سے رابطہ کیا گیا توانھوں نے اس بات کی تصدیق کرتے ہوئے ''ایکسپریس'' کوبتایا کہ شوبز سے کنارہ کشی کرکے اپنی فیملی کو ٹائم دے رہی تھی لیکن اس کے ساتھ میں جہاں شاعری کررہی تھی، وہیں اوسلومیں ہونے والے پروگراموں میں میزبانی کا سلسلہ بھی جاری تھا۔

انھوں نے بتایاکہ میرے شوہرطارق میر بہت اچھا گاتے تھے۔ ان کی اس صلاحیت کودنیا بھرتک پہنچانے کے لیے میں نے اورفیملی کے دوسرے لوگوں نے ان کی حوصلہ افزائی کی اورپھر وہ گیت ریکارڈ کرنے کے لیے تیارہوگئے۔ گیتوں کی ریکارڈنگ کے بعد ہم ان کے وڈیو بھی بنائیں گے اوراس میں بطورماڈل میں ایک مرتبہ پھر سے اپنی اننگز کا آغاز کروں گی لیکن یہ اننگز دوبارہ فلم اورٹی وی تک بھی پہنچے گی، اس کے بارے میں کچھ نہیں کہہ سکتی۔