بھارت کے خلاف قومی ٹیم جم کر کھیلے قوم ان کے ساتھ ہے وزیراعظم

وزیراعظم نوازشریف نے ورلڈکپ میں پاک بھارت میچ پر قومی ٹیم کے لیے نیک خواہشات کا اظہار کرتے ہوئے کہا ہے کہ روایتی حریف کے خلاف ٹیم جم کر کھیلے قوم ساتھ ہے۔


ایکسپریس نیوز کے مطابق وزیراعظم نوازشریف نے قومی ٹیم کی حوصلہ افزائی کرتے ہوئے کہا ہے کہ قوم کی نظریں کرکٹ ٹیم پر لگی ہوئی ہیں، ورلڈکپ میچوں میں ٹیم سے اچھی توقعات ہیں جب کہ بھارت کے خلاف ٹیم جم کر کھیلے قوم اس کے ساتھ ہے۔ انہوں نے کہا کہ بھارت کے خلاف میچ میں قوم کی دعائیں ٹیم کے ساتھ ہیں، قومی ٹیم اہم میچ کے لیے اپنی تمام توائیاں صرف کردے، کھلاڑی جوش وجذبے اور پراعتماد ہوکر کھیلیں۔

دوسری جانب وزیراعظم نے پاک بھارت میچ کے دوران ملک بھر میں لوڈشیڈنگ نہ کرنے کی ہدایت کی ہے اور بجلی کی بلاتعطل فراہمی کو یقینی بنانے کا حکم دیا ہے جب کہ کراچی کو بجلی فراہم کرنے والی کمپنی کے الیکٹرک نے بھی میچ کے موقع پر شہر میں لوڈشیڈنگ نہ کرنے کا اعلان کررکھا ہے۔