وزیراعظم نوازشریف کی اسپتالوں اور تعلیمی اداروں کی سکیورٹی بڑھانے کی ہدایت

پمز اسپتال میں فائرنگ کے واقعے کے بعد وزیراعظم نوازشریف نے اسپتالوں اور تعلیمی اداروں کی سکیورٹی بڑھانے کی ہدایت کردی ہے۔

سرکاری خبر رساں ادارے کے مطابق وزیراعظم نوازشریف نے گزشتہ روز پمز اسپتال میں فائرنگ سے زخمی ہونے والے ڈاکٹر شاہد نواز ملک کے علاج کے لیے 4 رکنی میڈیکل بورڈ تشکیل دینے کا حکم دے دیا ہے جو ڈاکٹر شاہد کے علاج اور ان کی صحت سے متعلق تمام ممکنہ اقدامات پر غور کرے گا۔

وزیراعظم نے پمز اسپتال میں فائرنگ کے بعد وزارت داخلہ کو اسلام آباد میں اسپتالوں اور تعلیمی اداروں سمیت اہم اداروں کی سکیورٹی بڑھانے کی بھی ہدایت کردی ہے۔

واضح رہے کہ گزشتہ روز پمز اسپتال میں نامعلوم افراد نے ماہر امراض قلب ڈاکٹر شاہد نواز پر فائرنگ کی تھی جس کے نتیجے میں انہیں سینے اور سر میں دو گولیاں لگیں جس کے باعث ان کی حالت تشویشناک بتائی جاتی ہے۔