بھارت میں سوائن فلو سے 600 افراد ہلاک اور ہزاروں متاثر

بھارت میں جان لیوا سوائن فلو سے گزشتہ ڈھائی ماہ کے دوران ہلاک ہونے والے افراد کی تعداد 600 سے زائد ہوگئی جب کہ ہزاروں افراد اب بھی اس بیماری کا شکار ہیں۔

بھارتی میڈیا کے مطابق ایچ ون این ون وائرس سے پھیلنے والے سوائن فلو میں مبتلا مریضوں کی تعداد گزشتہ ایک ہفتے میں دگنی ہوچکی ہے اور اس وقت مجموعی طور پر 11 ہزار سے زائد افراد اس بیماری کا شکار ہیں، جان لیوا وائرس نے ریاست گجرات، راجستھان، مدھیا پردیش، مہاراشٹرا، دہلی اور تامل ناڈو کے سیکڑوں شہریوں کو متاثر کیا جب کہ دیگر کئی ریاستوں کے شہری بھی اس وائرس سے بری طرح متاثر ہوئے۔


دوسری جانب بھارت میں حکومت کو حالات قابو میں نہ کر پانے اور دواؤں کی قلت پر شدید تنقید کا سامنا ہے تاہم وزیر صحت کا کہنا ہے کہ اسپتالوں میں اس بیماری کی دوا وافر مقدار میں موجود ہے اور حکومت تمام صورتحال پر نظر رکھے ہوئے ہے۔ ان کا کہنا تھا کہ ذرائع ابلاغ کے ذریعے عوام میں بیماری سے بچاؤ کے لئے آگہی مہم شروع کردی گئی اور صورتحال پر جلد قابو پالیا جائے گا۔

واضح رہے کہ ایچ ون این ون وائرس 2009 میں میکسیکو میں پہلی بار سامنے آیا تھا جس کے بعد یہ وائرس اب تک کئی ممالک میں سیکڑوں افراد کو شکار بنا چکا ہے۔