آصف زرداری کی سراج الحق سے چیرمین اور ڈپٹی چیرمین سینیٹ کے انتخابات پر مشاورت

سابق صدر آصف علی زرداری نے امیر جماعت اسلامی سے ٹیلیفون پر رابطہ کیا ہے جس میں دونوں رہنماؤں کے درمیان چیرمین سینیٹ اور ڈپٹی چیرمین سینیٹ کے انتخابات کے حوالے سے مشاورت کی گئی۔


ایکسپریس نیوز کے مطابق پیپلز پارٹی کے شریک چیرمین آصف علی زرداری نے امیر جماعت اسلامی سراج الحق کو ٹیلیفون کیا جس میں دونوں رہنماؤں کے درمیان ملکی سیاسی صورتحال سمیت چیرمین سینیٹ اور ڈپٹی چیرمین سینیٹ کے انتخابات کے حوالے سے گفتگو ہوئی۔ دونوں رہنماؤں کے درمیان 25 منٹ گفتگو جاری رہی جس میں ملک میں جمہوری عمل کے تسلسل اور مفاہمتی عمل کو بھی جاری رکھنے پر اتفاق کیا گیا۔

واضح رہے کہ جمعرات کو ہونے والے سینیٹ انتخابات کے بعد چیرمین سینیٹ اور ڈپٹی چیرمین سینیٹ کے انتخابات کے حوالے سے سیاسی ماحول گرم ہے اور سیاسی جماعتوں کے قائدین کا ایک دوسرے سے رابطوں کا سلسلہ بھی جاری ہے۔