جماعت اسلامی کے تحت ناموس مصطفیؐ مارچ آج ہوگا

توہین آمیز فلم کے اجرا کیخلاف جماعت اسلامی کے تحت ناموس مصطفیؐ مارچ آج (اتوار) سہ پہر ساڑھے3بجے مزار قائد سے تبت سینٹر تک ہوگا۔
مارچ کی قیادت جماعت اسلامی کے مرکزی جنرل سیکریٹری لیاقت بلوچ کریں گے، مارچ میں طلبا، اساتذہ، وکلا، علما، مزدور، تاجر، ڈاکٹرز، انجینئرز سمیت زندگی کے مختلف شعبوں سے تعلق رکھنے والے ہزاروں افراد شریک ہوکر ناموس مصطفی ؐکے تحفظ کا عزم کریں گے۔


دریں اثنا جماعت اسلامی کراچی کے امیر محمد حسین محنتی، سیکریٹری نسیم صدیقی ودیگر رہنمائوں نے مارچ کے سلسلے میں نمائش چورنگی پر لگائے جانے والے کیمپ کا دورہ کیا، موجود کارکنوں سے ملاقات کی اور مسافروں اور راہگیروں میں ہینڈ بلز تقسیم کیے، علاوہ ازیں ڈاکٹر سموئیل جارج کی قیادت میں اقلیتی برادری کے نمائندہ وفد نے ادارہ نورحق میں محمد حسین محنتی ودیگر رہنمائوں سے ملاقات کی اور ناموس مصطفیٰؐ مارچ کی حمایت کا اعلان کرتے ہوئے اس میں شرکت کی یقین دہانی کرائی، وفد میں پاسٹر امجد فاروق، پاسٹر رفیق، قالب بوٹا، پاسٹر شریف، پاسٹر جوزف، یونس سوہن خان ایڈووکیٹ، پرویز برکت اور دیگر شامل تھے۔