لانڈھی دیوار گرنے سے مزدور ہلاک گلستان جوہر سے لاش ملی

لانڈھی میں زیر تعمیر اسپورٹس کمپلیکس کی دیوار گرنے سے ایک مزدور ہلاک اور 2 زخمی ہوگئے۔


تفصیلات کے مطابق لانڈھی نمبر 2 میں زیر تعمیر اسپورٹس کمپلیکس کی دیوار گرنے سے مزدور ہلاک اور 2 زخمی ہوگئے ، ہلاک و زخمیوں کو فوری طور پر جناح اسپتال پہنچایا گیا ، لانڈھی پولیس کے مطابق ہلاک ہونے والے کی شناخت موسیٰ کے نام سے ہوئی جس کی عمر 25 برس تھی جبکہ زخمیوں میں رحیم علی اور عبدالوہاب شامل ہیں ، پولیس نے ضابطے کی کارروائی کے بعد موسیٰ کی لاش ورثا کے حوالے کردی ،دریں اثنا گلستان جوہر میں مکان سے معمر شخص کی کئی روز پرانی لاش ملی ہے جوکہ پراسرار طور پر ہلاک ہوا ہے۔

تفصیلات کے مطابق گلستان جوہر بلاک 19 میں مکان سے معمر شخص کی لاش ملی ، علاقہ ایس ایچ او آصف رئوف نے ایکسپریس کو بتایا کہ بلاک 19 میں پلاٹ نمبر B-39 پر واقع مکان سے معمر شخص کی لاش ملی ہے جس کی شناخت ذوالفقار علی کے نام سے ہوئی ہے ، اس کی موت طبعی طور پر ہوئی ہے جوکہ علاقے میں چوکیداری کا کام کرتا تھا ، پولیس نے ضابطے کی کارروائی کے بعد لاش ورثا کے حوالے کردی۔