صدرمملکت نے مسائل کو حل کرنے کی یقین دہانی کرادیمصطفی قریشی

فلم انڈسٹری اور ٹیلی ویژن کے فنکاروں نے گزشتہ دنوں صدر مملکت سے اسلام آباد میں ملاقات کی وفد میں اداکارہ زیبا،اعجاز درانی ،نشو،بہار بیگم، حبیب، قوی خان،علی اعجاز،شکیل، کنول نصیر،آغا ناصر اور نئیر کمال شامل تھیں۔


سینئر اداکار مصطفی قریشی نے اس ملاقات کے بارے میں ایکسپریس سے بات چیت کرتے ہوئے کہا کہ صدر مملکت ممنون حسین فلم انڈسٹری کی مشکلات اور مسائل سے بخوبی آگاہ ہیں، اداکار مصطفی قریشی نے کہا کہ حکومتوں کی جانب سے فلم انڈسٹری کو انڈسٹری کا درجہ دینے اور سہولتیں فراہم کرنے کی یقین دہانیوں کے باوجود اب تک اس پر توجہ نہیں دی گئی۔

اداکارہ روحی بانو، یاور حیات اور سینئر فلم ڈائریکٹر ایس سیلمان کے علاج معالجہ کے لیے پنجاب حکومت کے اعلان کے باوجود پانچ لاکھ روپئے کی امداد نہیں ملی۔ صدر مملکت نے روحی بانو، یاور حیات اور ایس سلیمان کو پانچ لاکھ نہیں دس لاکھ روپئے دینے کا اعلان کیا جو صدر مملکت نے اپنے خصوصی فنڈ سے جاری کرنے کا اعلان کیا انھوں نے کہا دس روز کے اندر ان تینوں کو یہ چیک پہنچ جائیں گے۔