پارلیمنٹ میں عمران خان کی عزت افزائی پران کی اہلیہ بھی چپ نہ رہ سکیں

تحریک انصاف کے ارکان کو ایوان میں واپسی پر حکومتی اور حزب اختلاف کے ارکان نے آڑے ہاتھوں کیا لیا کہ یہ بات عمران خان کی اہلیہ ریحام خان کو بہت ناگوار گزری جس کا اظہار انہوں نے سماجی رابطوں کی ویب سائٹ پر کردیا۔

تحریک انصاف کے ارکان عمران خان کی قیادت میں 7 ماہ بعد پارلیمنٹ کے مشترکہ اجلاس میں شرکت کے لیے ایوان پہنچے جہاں یہ اجلاس یمن کی صورتحال پر بلایا گیا تھا لیکن ایوان میں عمران خان سے خائف بیٹھے حکومتی اور حزب اختلاف کے اراکین نے ان پر چڑھائی کردی جس کے بعد پارلیمنٹ میں خوب شور شرابہ ہوا اور گو عمران گو کے نعرے بھی لگے جب کہ اس دوران وزیر دفاع خواجہ آصف جذبات میں آکر تحریک انصاف والوں کو شرم و حیا بھی دلاتے رہے۔


عمران خان کی اہلیہ ریحام کو اپنے شوہر نامدار کی اس عزت افزائی پر اس قدر غصہ آیا کہ وہ اس پر قابو نہ رکھ سکیں اور سماجی رابطوں کی ویب سائٹ پر اپنے جذبات کا اظہار کرتے ہوئے انہوں نے مشترکہ اجلاس کو تنقید کا نشانہ بنایا جس میں ان کا کہنا تھا کہ ''کیا یہ یمن کی صورتحال پر غور کے لیے پارلیمنٹ کا مشترکہ اجلاس بلایا گیا تھا جب کہ مشترکہ اجلاس کسی اور سمت جارہا ہے''۔