روم ماسٹرز ٹینس میں جوکووک کی سیمی فائنل میں رسائی

LONDON:
روم ماسٹرز ٹینس ٹورنامنٹ میں دفاعی چیمپئن نووک جوکووک نے سیمی فائنل میں رسائی حاصل کرلی۔

ورلڈ نمبر ون نے کوارٹر فائنل میں کائی نیشکوری کو یکطرفہ مقابلے میں زیر کیا، فائنل میں رسائی کے لیے ان کو ڈیوڈ فیرر کا چیلنج درپیش ہوگا، راجر فیڈرر بھی کامیاب رہے۔ ویمنز ایونٹ میں کارلا سواریز نے پیٹرا کویٹووا کو ہرا دیا، لاسٹ فورمیں ان کا سامنا سیمونا ہالیپ سے ہوگا۔


تفصیلات کے مطابق سربیا کے نووک جوکووک روم ماسٹرز ٹینس ٹائٹل کے دفاع سے 2 فتح دور رہ گئے ، یکطرفہ کوارٹر فائنل میں انھوں نے جاپان کے کائی نیشکوری کو6-3، 3-6 اور6-1 سے مات دی، جوکووک کو ہفتے کے روز سیمی فائنل میں اسپین حریف ڈیوڈ فیرر سے مقابلہ کرنا ہوگا،جنھوں نے بیلجیئم کے ڈیوڈ گوفن کو 6-2، 4-6 اور 6-3 سے زیر کیا۔

قبل ازیں راجر فیڈرر نے ٹومس بریڈیچ پر اسٹریٹ اسیٹس میں 6-3 اور 6-3 سے غلبہ پاکر سیمی فائنل کا ٹکٹ حاصل کر لیا۔ ادھر ویمنز سنگلز میں کارلا سواریز نے پیٹرا کویٹووا کو 6-3 اور 6-2 سے ہرا دیا، سیمی فائنل میں ان کا سامنا سیمونا ہالیپ سے ہوگا جوکوالیفائر الیکسینڈرا ڈلگیرو کیخلاف 6-1 اور 6-0 سے فاتح رہیں۔ ڈیریا گیوریلووا نے ساتھی کوالیفائر کرسٹینا میک ہیل پر 6-2 اور 6-4 سے قابو پایا۔