افسروں کی ترقیوں کو صوبائیت کا رنگ نہیں دینا چاہیے وزیراعظم

وزیراعظم نواز شریف نے کہا ہے کہ سول سروس میں ترقیوں کے معاملے کو صوبائیت کا رنگ نہیں دینا چاہیئے اور تیسرے درجے کے سفارشی افسر کو اول درجے پر ترجیح دینا ہماری پالیسی نہیں۔



قومی اسمبلی اجلاس کے دوران اپوزیشن لیڈر خورشید شاہ کی جانب سے اٹھائے گئے اعتراض پر انھوں نے کہا کہ سول سروس میں ہونے والی ترقیوں میں حکومت کا کوئی عمل دخل نہیں۔ ہمیں عوام کے ساتھ انصاف کرنے کیلیے اصولوں پر عمل پیرا ہونا پڑیگا۔ بیورو کریسی میں ترقیوں کا تعلق صوبائیت سے نہیں ہے۔ وزیراعظم نے کہا کہ میں فیڈرل پبلک سروس کمیشن (ایف پی ایس سی) کے چیئرمین کو نہیں جانتا۔




وزیراعظم نے کہا کہ ایف اپی ایس سی کے قائم مقام چیئرمین پیپلز پارٹی کے دور حکومت میں ایف پی ایس سی کے ممبر تعینات ہوئے۔ اب وہ قائم مقام چیئرمین کی خدمات انجام دے رہے ہیں۔ ترقیوں کے معاملے کو ہم سیاست زدہ نہیں کرنا چاہتے۔ انھوں نے کہاکہ بیوروکریسی میں ترقیوں کے حوالے سے جب بھی میرے پاس معاملہ آئے گا میں اپوزیشن لیڈر سے مشاورت کے بعد کوئی فیصلہ کروں گا۔ خورشید شاہ بہت جلد گھبرا جاتے ہیں، انھیں سول سروس میں بھرتیوں کے معاملہ پر گھبرانا نہیں چاہیئے۔



نواز شریف نے کہا کہ عوام کے ساتھ انصاف میرٹ کے ذریعے ہی ممکن ہے، ہم نے اداروں میں میرٹ پر بھرتیاں کیں۔ پرائم منسٹر ڈیلیوری یونٹ (پی ایم ڈی یو) کے ایک اجلاس کی صدارت کرتے ہوئے نواز شریف نے کہا کہ حکومت ہر شعبے میں شفافیت اور میرٹ کو یقینی بنا رہی ہے۔

https://www.dailymotion.com/video/x2qpoop_nawaz-sharif-national-assembly_news