آپریشن ضرب عضب کے شہدا کی عظیم قربانیاں قوم ہمیشہ یاد رکھے گی نواز شریف

وزیراعظم نواز شریف نے دہشتگردوں کے خلاف جاری آپریشن ضرب عضب کے ایک سال مکمل ہونے پر قوم اور پاک فوج کو مبارکباد پیش کرتے ہوئے کہا ہے کہ آپریشن ضرب عضب دہشتگردی کو جڑ سے اکھاڑ پھینکنے کے عزم کا مظہر ہے۔





وزیراعظم نے اپنے پیغام میں کہا کہ پرخطر محاذ پر لڑکر شہید ہونے والے جوانوں نے اپنے آج کو قوم کے مستقبل پر قربان کیا قوم شہدا اور ان کے لواحقین کی عظیم قربانیوں کو ہمیشہ یاد رکھے گی۔ انہوں نے کہا کہ آج کے دن پوری قوم پاک افواج کے ساتھ اظہار یکجہتی کرتی ہے، پاکستان کامیابی سے دہشت گردی کا قلع قمع کر رہا ہے جس مقصد کے لئے بیٹوں، شوہروں اور بھائیوں کی قربانی دینے والوں کے شکر گزار ہیں۔






اپنے ایک بیان میں وزیردفاع خواجہ آصف کا کہنا تھا کہ پاک فوج کے جوانوں نے قوم کے مستقبل کے لئے اپنا آج قربان کردیا، شہداء کے خاندانوں نے عظیم قربانیاں دیں، قوم پاک فوج کو عزت کی نگاہ سے دیکھتی اور شہداء کو خراج عقیدت پیش کرتی ہے۔ انہوں نے کہا کہ آپریشن ضرب عضب کا ایک سال "فتح کا سال" ہے اور دہشت گردوں کے خلاف یہ آپریشن اب آخری مراحل میں داخل ہوچکا ہے.

واضح رہے کہ آپریشن ضرب عضب کے دوران اب تک 2 ہزار763 دہشت گرد ہلاک اوران کے 837 ٹھکانے تباہ کرتے ہوئے 253 ٹن بارودی مواد برآمد کیا جاچکا ہے جب کہ دہشت گردوں کو ٹھکانے لگانے کے لئے 347 افسر اور جوانوں نے جام شہادت نوش کیا۔