کراچی پیپلزپارٹی کی رکن سندھ اسمبلی کلثوم چانڈیو فائرنگ سے زخمی

پیپلز پارٹی کی رکن سندھ اسمبلی کلثوم اختر چانڈیو گاڑی پر نامعلوم افراد کی فائرنگ سے زخمی ہوگئیں۔

ایکسپریس نیوز کے مطابق فائرنگ کا واقعہ ڈیفنس کے علاقے زمزمہ میں پیش آیا جس کے نتیجے میں پیپلز پارٹی کی رکن سندھ اسمبلی کلثوم چانڈیو زخمی ہوگئیں۔


کلثوم چانڈیو کو زخمی حالت میں اسپتال منتقل کردیا گیا جہاں انہیں طبی امداد فراہم کی جارہی ہے جب کہ اسپتال ذرائع کا کہنا ہے کہ کلثوم چانڈیو کو ٹانگ میں گولی لگی ہے۔

شہر میں آج بھی فائرنگ کا سلسلہ جاری رہا جس میں متعدد افراد ہلاک اور زخمی ہوگئے۔ دوسری جانب تاجروں نے بھی شہر کے بگڑتے ہوئے حالات کے پیش نظر فوج بلانے کا مطالبہ کیا ہے۔