انڈسٹری کی بحالی کے باوجود موسیقی میں بہتری نہیں ہوئی شبانہ کوثر

''گھونگھٹ''، ''یس باس''، ''چور مچائے شور'' سمیت 35سے زائد فلموں میں پلے بیک گلوکاری کرنے والی گلوکارہ شبانہ کوثر نے کہا ہے کہ پاکستان میں فلم انڈسٹری کی بحالی شروع ہوگئی مگر میوزک کے شعبے میں کوئی بہتری نہیں آئی۔


ان کا کہنا تھا کہ موسیقی کے میدان میں ہمارے پاس دنیا کے بہترین گائیک ، نغمہ نگار اور میوزک ڈائریکٹر ہیں ۔ جن کے گائے اور کمپوز کیے ہوئے گانوں کو بالی ووڈ میں بھی کاپی کیا جاتا رہا۔ فلمی بحران سے میوزک سے وابستہ میوزیشنز ، گلوکار،کمپوزر بھی بے روزگار ہوئے، آج جب فلمی سرگرمیاں بھرپور انداز سے شروع ہوچکی ہیں ۔ مگر اس بحالی کا موسیقی کے لوگوں کے لیے خوشحالی کا کوئی پیغام نہیں لے کر آئی۔ فلم میکر اپنے ان باصلاحیت لوگوں کے بجائے بالی ووڈ جاکر پوسٹ پروڈکشن کے ساتھ میوزک بھی وہیں ریکارڈ کروانے لگے ہیں۔

شبانہ کوثر نے کہا کہ ہمارے فلم میکر اسی سنگر کی آواز میں گانا شامل کرتے ہیں جو بالی ووڈ کی یاترا کرکے آیا ہو۔ کتنی عجیب بات ہے کہ بالی ووڈ والے ہمارے سنگرز ، رائٹرز اور کمپوزر کے ساتھ کام کر رہے ہیں۔ انھوں نے کہا کہ ابھی تک جتنی بھی پاکستانی فلمیں ریلیز ہوئی ہیں ان میں سے کسی ایک بھی میوزک ہٹ نہیں ہوا۔ ماضی میں فلمساز اور ہدایتکار اسکرپٹ کے ساتھ میوزک پر بھی کام کرتے تھے اور یہ گانے آج بھی مقبول عام ہیں۔