سانحہ صفورا کیس کے 2 سرکاری وکلا سیکیورٹی نہ ملنے پر مستعفی

لاہور:
سانحہ صفورا کیس کے 2 اسپیشل پبلک پراسیکیوٹرز حکومت کی جانب سے سیکیورٹی نہ ملنے پر مستعفی ہوگئے ہیں۔


ایکسپریس نیوز کے مطابق اسپیشل پبلک پراسیکیوٹر محمد خان برڑو اور مبشر مرزا نے سانحہ صفورا کیس میں سرکار کی جانب سے پیش ہونے سے انکار کرتے ہوئے استعفیٰ دے دیا ہے۔ دونوں وکلا نے اپنے استعفے میں مقدمات کی پیروی سے انکار کی وجہ سیکیورٹی کی عدم فراہمی اور یقین دہانی کے باوجود طے شدہ معاوضے کی عدم ادائیگی بیان کی ہے۔

واضح رہے کہ رواں برس کراچی کے علاقے صفورا گوٹھ کے قریب بس میں گھس کر 40 زائد افراد کو قتل کردیا گیا تھا، پولیس نے واقعے میں ملوث کئی ملزمان کو گرفتار کرلیا ہے جن کے خلاف مقدمات کی سماعت جاری ہے۔