ہر فلم کی شوٹنگ کے دوران کاجول ضرور یاد آتی ہے شاہ رخ خان

بالی ووڈ کے کنگ شاہ رخ خان کا کہنا ہے کہ اداکارہ کاجول اسکرین پر جادو بکھیرتی ہیں اس لیے وہ انہیں اپنی ہر فلم کی شوٹنگ کے دوران یاد کرتے ہیں۔

بھارتی میڈیا رپورٹس کے مطابق بالی ووڈ کے کنگ شاہ رخ خان کا اپنی ساتھی اداکارہ کاجول کے حوالے سے کہنا تھا کہ انہوں نے نئی آنے والی فلم "دل والے" کے لیے 150 دن سے بھی زائد شوٹنگ کے لیے وقف کیے جہاں وہ اپنے بچوں سے دور رہیں جوایک ماں کے لیے خاصا مشکل ہے۔ انہوں نے کہا کہ کاجول ایک ایماندار اداکارہ ہیں جو اپنے کردار کا حق ادا کرتی ہیں اور یہی ان کی بہترین خاصیت ہے۔


کنگ خان نے کاجول کی تعریف کے پل باندھتے ہوئے یہاں تک کہا کہ ہم بے چین فنکار کی مانند ہیں جہاں ہمیں زیادہ سے زیادہ فلمیں اور پیسے چاہیئے ہوتے ہیں لیکن کاجول اس حوالے سے ایک بے چین فنکار نہیں اور نہ ہی وہ زیادہ فلموں اور پیسے کی پرواہ کرتی ہیں، ہماری پوری ٹیم ان کی شکر گزار ہے کہ انہوں نے فلم "دل والے" کے لیے وقت نکالا۔

واضح رہے کہ روہت شیٹی کی ہدایت کاری میں بنائی جانے والی فلم "دل والے" 18 دسمبرکو سینما گھروں کی زینت بنے گی۔