شارجہ ٹیسٹ پرفارمنس توقعات کے مطابق نہیں رہی مشتاق

پاکستان کا اظہر علی کو بطور اوپنر کھلانے کا تجربہ پہلی کوشش میں بری طرح ناکام ہوگیا، بیٹنگ آرڈر میں چھیڑ چھاڑ سے الجھنیں مزید بڑھ گئیں۔


تفصیلات کے مطابق پاکستان نے گذشتہ 5 برس کے دوران 13 مختلف اوپننگ جوڑیوں کو آزمایاجن میں محمد حفیظ اور توفیق عمر کی جوڑی نے سب سے زیادہ 35 اننگز ایک ساتھ کھیلیں۔ ٹیسٹ میں پاکستان کی مستحکم بیٹنگ لائن میں اوپننگ واحد کمزور کڑی ہے جس کو بہتر بنانے کے لیے شارجہ میں اظہرعلی کو اپنی تیسری مضبوط بیٹنگ پوزیشن سے ہٹا کر اسپیشلسٹ اوپنر شان مسعود کی جگہ کھلایا گیا اور وہ سات بالز کا سامنا کرنے کے بعد صفر پر آؤٹ ہوگئے۔

بولنگ کوچ مشتاق احمد نے اظہر علی کے ساتھ کیے جانے والے تجربے کے بارے میں کہا کہ میں سمجھتا ہوں کہ آپ ایک میچ میں اپنے ٹیم کمبی نیشن کے ساتھ تجربہ کرسکتے ہیں، پہلی اننگز میں ٹیم کے 234 رنزپر آؤٹ ہونے کے بارے میں مشتاق کا کہنا تھا کہ میرے خیال میں پہلے روز ہماری پرفارمنس توقعات کے مطابق نہیں تھی، ہم نے اہم مواقع پر وکٹیں گنوائی ہیں، آؤٹ فیلڈ کافی سلو تھی مگر میں سمجھتا ہوں کہ 4 یا 5 وکٹیں ہم نے خود ہی گنوا دیں، جیسے جیسے کھیل آگے بڑھے گا وکٹ اور زیادہ سلو ہوتی جائے گی۔