اسرائیلی فوج کی فائرنگ سے 3 فلسطینی شہید

صیہونی فوج نے مغربی کنارے میں آپریشن کر کے 3 فلسطینیوں کو شہید کردیا۔


غیر ملکی خبر رساں ادارے کے مطابق اسرائیلی فوج نے ایک یہودی مہم جو کو ہلاک کرنے کا الزام لگا کر مغربی کنارے کے علاقے قلندریہ میں آپریشن کر کے ایک مکان کو گرانے کی کوشش کی تو فلسطینیوں کی جانب سے مزاحمت کی گئی جس پر صیہونی افواج نے مظاہرین پر اندھا دھند فائرنگ کر دی جس کے نتیجے میں 3 فلسطینی شہید اور متعدد زخمی ہو گئے۔ زخمیوں کو طبی امداد کے لئے فوری طور پر قریبی اسپتالوں میں منتقل کیا گیا جہاں انھیں طبی امداد دی جا رہی ہے۔

واضح رہے کہ رواں برس جون میں مغربی کنارے میں دیلوو کے قریب غیر قانونی تعمیرات کے پاس ایک اسرائیلی مہم جو ہلاک اور ایک زخمی ہو گیا تھا جس کا الزام اسرائیل نے قلندریہ کے ایک فلسطینی شہری پر عائد کیا تھا۔