سکھر میں کار اور کوچ کے درمیان تصادم سے دلہا دلہن سمیت 6 افراد جاں بحق

سٹی بائی پاس پر کار اور مسافر کوچ کے درمیان تصادم کے نتیجے میں دلہا اور دلہن سمیت 6 افراد جاں بحق جب کہ ایک شخص زخمی ہوگیا۔

ایکسپریس نیوز کے مطابق سکھر کے علاقے ٹاؤن شپ کے رہائشی دلہے عثمان اور دلہن بشریٰ اپنے ولیمے کی تقریب میں شرکت کے بعد واپس آرہے تھے کہ سٹی بائی پاس پر راولپنڈی سے کراچی آنے والی مسافر کوچ ان کی کار سے ٹکرا گئی۔


حادثے کے نتیجے میں کار میں سوار عثمان اور بشریٰ کے علاوہ 3 خواتین اور ایک بچہ موقع پر ہی جاں بحق جب کہ ایک نوجوان زخمی ہوگیا، زندگی کی بازی ہارنے والی خواتین کی شناخت کرن، ہما اور سویرا کے نام سے ہوئی ہے جب کہ عدنان کی حالت تشویش ناک ہے۔

حادثے کے بعد کوچ کا ڈرائیور فرار ہوگیا جب کہ پولیس نے کوچ کو قبضے میں لے کر مسافروں کو متبادل بس کے ذریعے کراچی کے لیے روانہ کردیا۔