موٹر وے پولیس نے بچھڑنے والے بچے کو والدین سے ملوادیا

موٹر وے پولیس نے حسن اسکوائر انٹرچینج کے قریب بچھڑنے والے بچے کو والدین سے ملوادیا جبکہ پولیس سپر ہائی وے پر شہری سے نقدی لوٹ کر فرار ہونے والے ملزمان کو تعاقب کے بعد گرفتار کرلیا ، تفصیلات کے مطابق نیشنل ہائی ویز اینڈ موٹر وے پولیس سائوتھ کے افسران اشرف جان اور وقار احمد لیاری ایکسپریس وے پر گشت پر مصروف تھے کہ حسن اسکوائر انٹر چینج پر انھوں نے ایک بچے کو دیکھا جوکہ والدین سے بچھڑ گیا تھا ،


موٹر وے پولیس نے بچے سے موبائل نمبر حاصل کرکے اس کے والد کو اطلاع دی اور بچے فرید اللہ کو اس کے والد محمد یوسف کے حوالے کردیا ، علاوہ ازیں سپر ہائی وے پر پھلیلی واہ کے قریب ضیا اللہ نامی شہری سے ڈاکو 2 لاکھ روپے اور موٹر سائیکل چھین کر فرار ہورہے تھے کہ اطلاع ملنے پر سائوتھ کے افسران طفیل شیخ اور اسحاق بوزدار نے ملزمان کا تعاقب کرکے گرفتار کرلیا ،

دونوں ملزمان کے قبضے سے پستول ، چھینی ہوئی رقم اور موٹر سائیکل برآمد کرکے متعلقہ پولیس کے حوالے کردی ، ڈی آئی جی موٹر وے پولیس سائوتھ ڈاکٹر ولی اللہ دل نے دونوں کارروائیوں میں افسران کی کارکردگی کو سراہتے ہوئے نقد انعامات و تعریفی اسناد دینے کا اعلان کیا ہے ۔