وفاقی کابینہ کو آج سوئس حکام کو خط پر اعتماد میں لیا جائیگا

وزیراعظم راجا پرویز اشرف کی زیر صدارت وفاقی کابینہ کا اجلاس (آج ) بدھ کو وزیراعظم سیکریٹریٹ میں ہوگا۔


اجلاس میں ملک کی موجودہ سیاسی صورتحال کے ساتھ ساتھ توانائی بحران، بلوچستان کمیٹی کی رپورٹ پر بحث و تجاویز بھی پیش کی جائیں گی ۔

ذرائع نے بتایا ہے کہ وفاقی کابینہ میں سوئس حکام کو سپریم کورٹ کے حکم پر سابق اٹارنی جنرل ملک قیوم کے صدر زرداری کیخلاف مقدمات کو ختم کرنے بارے خط کو واپس لینے کے لیے لکھے گئے مجوزہ خط کے حوالے سے اعتماد میں لیا جائیگا،اجلاس میں وزیراعظم کابینہ کو سعودی عرب میں حج کے موقع پر خادم الحرمین الشریفین شاہ عبداﷲ بن عبدالعزیز سمیت دیگر مسلم رہنمائوں سے اپنی ملاقاتوں کی تفصیلات سے بھی آگاہ کرینگے۔