بھارتی اداکارنوازالدین صدیقی پرخاتون کوتھپڑمارنے کے الزام میں مقدمہ درج

اپنے کردارمیں ڈھل جانے کے حوالے سے مشہوراداکارنوازالدین صدیقی پرخاتون کو تھپڑمارنے کے الزام میں مقدمہ درج کرلیا گیا ہے۔

بھارتی میڈیا کے مطابق بالی ووڈ اداکار نواز الدین صدیقی کے علاقے میں رہائش پذیرخاتون حنا شیخ نے پارکنگ کے تنازع پر تھپڑ مارنے کا الزام عائد کیا جس کے بعد ان کے خلاف ممبئی کے وارسوا پولیس اسٹیشن میں مقدمہ درج کرلیا گیا ہے۔


خاتون نے الزام عائد کیا ہے کہ نواز الدین صدیقی سے ہاؤسنگ سوسائٹی کے پارکنگ ایریا پر قبضے کے باعث اختلافات ہیں تاہم آج میری بیٹی نے نواز کی تصویریں کھینچنے کی کوشش کی تو انہوں نے اپنے بھائی اور ملازمین کے ساتھ مل کر بد تمیزی کی اور دھکے بھی دیئے جب کہ اداکار نواز الدین نے انہیں تھپڑ بھی مارا جب کہ دوسری جانب نواز الدین صدیقی کے بھائی فیض صدیقی نے خاتون کی جانب سے لگائے گئے الزامات کی سختی سے تردید کی ہے۔

واضح رہے کہ بالی ووڈ اداکارنوازالدین اپنی نئی آنے والی فلم'' ٹی ای تھری این'' کی شوٹنگ میں مصروف ہیں جس میں ان کے ساتھ امیتابھ بچن اور ودیا بالن مرکزی کردارادا کریں گے۔