آئی جی پنجاب کو صوبے کے تعلیمی اداروں کو فول پروف سیکیورٹی فراہم کرنے کا حکم

ہائی کورٹ نے آئی جی پنجاب کو صوبے میں تعلیمی اداروں کو فول پروف سیکیورٹی فراہم کرنے کی ہدایت جاری کردی ہے۔


لاہور ہائی کورٹ کے جج جسٹس علی اکبر قریشی نے صوبے میں تعلیمی اداروں کی سیکیورٹی کے لئے اٹھائے گئے انتظامات سے متعلق درخواست کی سماعت کی۔

سماعت کے دوران درخواست گزار کی جانب سے موقف اختیار کیا گیا کہ طالب علم ملک کا مستقبل ہیں، ان کی جان و مال کی حفاظت حکومت کا فرض ہے لیکن حکومت تعلیمی اداروں کی سکیورٹی میں ناکام ہو چکی ہے، ضلعی انتظامیہ کی مانیٹرنگ ٹیمیں صرف کاغذی کاروائی کر رہی ہیں۔ اس لئے عدالت متعلقہ اداروں کو درسگاہوں کی سیکیورٹی فول پروف کرنے کا حکم دے اور اس سے متعلق رپورٹ طلب کرے۔ عدالت عالیہ نے درخواست نمٹاتے ہوئے آئی جی پولیس پنجاب کو فول پروف انتظامات کی ہدایت کردی۔