کپل شرما کا کیرئیر بچانے کے لیے کنگ خان میدان میں آگئے

معروف کامیڈین اور اداکار کپل شرما ''کامیڈی نائٹس ود کپل'' کی انتظامیہ سے اختلاف کے باعث نئے چینل سے اسی طرز کا شو کرتے نظر آئیں گے جس کے پہلے شو میں شاہ رخ خان اپنی فلم کی تشہیر کریں گے۔

بھارت کے مشہور کامیڈین کپل شرما کسی تعارف کے محتاج نہیں ہیں یہی وجہ ہے کہ ان کا مزاحیہ شو''کامیڈی نائٹس ود کپل'' بھارت اور پاکستان سمیت دنیا بھر میں مشہور ہے جب کہ گزشتہ دنوں شو انتظامیہ سے اختلافات کے بعد کپل شرما نے اپنا شہرہ آفاق کامیڈی شو چھوڑ دیا تھا جس کے بعد اب کنگ خان نے ان کے کیرئیر کو بچانے کے لیے میدان میں آگئے ہیں۔


میڈیا رپورٹس کے مطابق کپل شرما ''کامیڈی نائٹس ود کپل'' کی انتظامیہ سے اختلافات کے باعث ٹی وی چینل چھوڑ چکے ہیں جس کے بعد اب وہ ایک اور ٹی وی چینل میں اسی طرز کا پروگرام شروع کرنے جارہے ہیں جب کہ کپل شرما نے کنگ خان کو نئے چینل پر پہلے شومیں شرکت کی دعوت دی ہے جسے کنگ خان نے قبول کرتے ہوئے شو میں آنے کی حامی بھرلی ہے جس میں وہ اپنی نئی آنے والی فلم ''فین'' کی تشہیر بھی کریں گے۔

واضح رہے کہ کامیڈین کپل شرما نے گزشتہ سال فلم ''کس کس کو پیار کروں'' سے فلمی کیرئیر کا آغاز کیا تھا۔