عذیر بلوچ کے سنسنی خیز بیانات کی وڈیو ریکارڈنگ مکمل

کالعدم پیپلزامن کمیٹی کے سابق سربراہ اورسنگین جرائم میں مطلوب ملزم عذیر بلوچ کے سنسنی خیز انکشافات پرمبنی بیانات کی 20 گھنٹوں سے زائدوقت پرمبنی وڈیوریکارڈنگ مبینہ طورپر مکمل کرلی گئی ہے۔


ذرائع نے بتایا کہ ملزم عذیربلوچ کے سیاسی رہنماؤں پر لگائے گئے الزامات کی ٹھوس شہادتیں بھی حاصل کرنے کیلیے حکام کی طرف سے ہدایات جاری کی گئی ہیں اورواضح کیا گیا ہے کہ جب تک ناقابل تردید شہادتیں دستیاب نہ ہوں تب تک ملزم کے بیانات کی روشنی میں کوئی گرفتاری عمل میں نہ لائی جائے۔

ذرائع کے مطابق ملزم کے انکشافات کی بنیادپرتفتیش کاردائرہ کاروسیع کرچکے ہیں اورسندھ سے تعلق رکھنے والے پیپلزپارٹی کے ایک سابق رہنماکے اکاؤنٹس کی پڑتال کی جارہی ہے تاکہ پتہ چلایا جائے کہ عذیر بلوچ کے انھیں ماہانہ بھاری رقم بطوربھتہ دینے کے الزامات میںکتنی صداقت ہے۔ذرائع کاکہناہے کہ عذیربلوچ کے بیانات کی روشنی میں ملنے والے ثبوت کچھ مقدمات میں غیرمعمولی اہمیت کے حامل ہیں۔