برطانیہ کے بعد امریکا نے بھی غلام احمد بلورکے داخلے پرپابندی لگادی

اسلام آباد میں امریکی سفارتخانے نے وفاقی وزیر ریلوےغلام احمد بلور اور ان کی اہلیہ کے ویزے منسوخ کر کے ان پر امریکا میں داخلے پر پابندی لگادی ہے۔

وفاقی وزیر غلام احمد بلور نے بتایا کہ آج امریکی سفارتخانے کی جانب سے انہیں ایک کال موصول ہوئی جس میں میرے اورمیری اہلیہ کے ویزے کی منسوخی اور داخلے پر پابندی سے متعلق بتایا گیا۔ انہوں نے کہا کہ مجھے امریکا اور برطانیہ میں داخلے پر عائد پابندی سے کوئی فرق نہیں پڑتا ہاں فکراورپریشانی کی بات اس وقت ہوتی جب مکہ یا مدینہ جانے سے روکا جاتا۔


دوسری جانب امریکی سفارتخانے کے ترجمان نے اس واقعے پرکسی بھی قسم کا تبصرہ کرنے سے گریز کیا۔

واضح رہے کہ وفاقی وزیرریلوے غلام احمد بلور نے گستاخانہ فلم بنانے والے شخص کو قتل کرنے پرایک لاکھ ڈالرانعام دینے کا اعلان کیا تھا۔ ان کے اس اعلان کے بعد برطانیہ نے پہلے ہی انہیں ناپسندیدہ شخص قرار دے کر ان کے داخلے پر پابندی عائد کررکھی ہے۔