پاکستانی اور بھارتی کرکٹ فینز کے ٹرینڈ نے فیس بک کے بانی کو بھی متاثر کردیا

اس وقت دنیا انٹرنیٹ ویب سائٹس اور سوشل میڈیا کی اسیر نظر آرہی ہے اور کوئی بھی ایونٹس ہو سوشل میڈیا کے ذریعے کروڑوں لوگوں تک پہنچ جاتا ہے جب کہ اس وقت پاکستان اور بھارت کے درمیان کرکٹ میچ دنیا بھر کے لاکھوں لوگوں کی نظروں کا مرکز بنا ہوا ہے پاکستانی اور بھارتی عوام نے تو اس موقع سے فائدہ اٹھاتے ہوئے اسے دونوں ملکوں کے درمیان امن کا نشان بنا دیا ہے اور انہوں نے فیس بک پر اپنی پروفائل تصاویر کے گرد مخالف کھلاڑیوں کی تصاویرلگا کر امن اور محبت کا پیغام دے دیا ہے جس سے فیس بک کے بانی مارک زکر برگ بھی متاثر ہوئے بغیر نہ رہ سکے۔

ابھی پاک بھارت ٹاکرے کو 2 روز باقی ہیں لیکن سوشل میڈیا پر ماحول گرم ہوچکا ہے لیکن اس بہترین موقع سے فائدہ اٹھاتے ہوئے لاکھوں افراد نے اپنی اپنی حکومتوں کو امن کا پیغام بھی دیناشروع کردیا ہے جس کے لیے پاکستانی ٹیم کے مداح بھارتی کھلاڑیوں کی اور بھارتی ٹیم کے مداح پاکستانی کھلاڑیوں کے تصاویر یا پھر پاکستانی اپنی پروفائل تصاویر پر بھارت جھنڈے کا رنگ اور بھارتی پاکستانی جھنڈے کا رنگ بنا کر امن کا پیغام دے رہے ہیں۔ فیس بک پر ہیش ٹیگ پروفائل فار پیس اس وقت سب سے بڑا ٹریند بن چکا ہے جس میں مخالف ٹیموں کے جھنڈوں کے رنگ لگا ئے جا رہے ہیں۔


https://www.facebook.com/photo.php?fbid=10102717445294641&set=a.612287952871.2204760.4&type=3&theater

اس حیرت انگیز اور خوشگوار تبدیلی سے فیس بک کے بانی زکر برگ بھی متاثر ہوئے بھی نہ رہ سکے اور فیس بک پر اپنے ایک بیان میں ان کا کہنا تھا کہ پاکستان اور بھارت میں فیس بک پر وائرل ہونے والا یہ ٹرینڈ دلچسپ ہے کہ پاکستانی فین بھارتی کھلاڑیوں کی جب کہ بھارتی فین پاکستانی کھلاڑیوں کی تصاویراپنی تصویر کے گرد لگا رہے ہیں اس سے دونوں ملکوں کے عوام کا ایک دوسرے کے لیے امن کا اظہار ہوتا ہے۔