ایران کے جوہری معاہدے کے فوائد ناقابل تردیدہیں اوباما

امریکی صدر براک اوباما نے کہا ہے کہ ایران کے جوہری معاہدے کے فوائد ''ناقابل تردید''ہیں گو کہ اس کے حقیقی ثمرات کا فائدہ لوگوں تک پہنچنے میں وقت لگ سکتا ہے۔


غیرملکی میڈیا کے مطابق نئے فارسی سال نوروز کے موقع پرایرانی عوام کے لیے اپنے وڈیو پیغام میں صدر اوباما کا کہنا تھا کہ معاہدے کے تحت ایران کے لیے ممکن ہوا کہ وہ تجارت اور سرمایہ کاری کو بڑھا کر، روزگارکے مواقع پیدا کرنے اوردنیا بھرمیں ایرانیوں کوان کی مصنوعات فروخت کرنے کے مواقع دے کردوبارہ عالمی اقتصادیات میں شامل ہو۔ امریکا کے اب بھی ایران کے ساتھ گہرے اختلافات ہیں حقیقت یہ ہے کہ یہ ممالک دہائیوں میں پہلی بارمسائل کے حل کے لیے تواتر سے بات چیت کررہے ہیں۔

صدراوباما کا کہنا تھا کہ گزشتہ سال ایران اور6 عالمی طاقتوں کے مابین تہران کے جوہری پروگرام کو محدود کرنے کے عوض اس پرعائد تعزیرات ہٹانے کا معاہدہ ہوا تھا جس پر جنوری میں عملدرآمد شروع ہوا۔