عمران خان گڑھا دوسروں کے لئے کھودتے ہیں اور خود اسی میں گر جاتے ہیں پرویز رشید

وفاقی وزیراطلاعات پرویز رشید کا کہنا ہے کہ عمران خان نے جو باتیں کیں وہ 3 سال سے روزانہ سن رہے ہیں۔

چیئرمین تحریک انصاف عمران خان کے خطاب پر شدید رد عمل کا اظہار کرتے ہوئے پرویز رشید کا کہنا تھا کہ عمران خان کی بچکانہ باتوں کا جواب دیتے دیتے تھک چکے ہیں اور انہوں نے ایک مرتبہ پھر اپنے خطاب میں وہیں باتیں کیں جو وہ گزشتہ 3 سال سے کر رہے ہیں جب کہ ان کی باتوں میں کوئی نئی بات نہیں تھی۔ انہوں نے کہا کہ تحریک انصاف کی جانب سے دھرنا ون، پلان ون، بی پلان اس جیسے کئی پلان دیکھے ہیں لیکن عمران خان گڑھا دوسروں کے لئے کھودتے ہیں اور خود اسی میں گر جاتے ہیں۔


وفاقی وزیراطلاعات کا کہنا تھا کہ عمران خان سب کو اپنا مخالف بنا بیٹھے ہیں اور سب انہیں اپنا مخالف سمجھتے ہیں، کروڑوں لوگوں نے دیکھا کہ حکومت کے خلاف دھرنے میں آنے والے مزدور عمران خان سے دھرنوں کے پیسے مانگ رہے تھے۔