ہریتھک ہالی ووڈ سپر اسٹار سیلویسٹر اسٹالون سے ملنے کے خواہش مند

بالی ووڈ کے ایکشن ہیرو ہریتھک روشن ہالی ووڈ کے سپر اسٹار سیلویسٹر اسٹالون کے سب سے بڑے مداح نکلے اور ان سے ملاقات کی خواہش کا اظہار کردیا۔

بالی ووڈ کے اسٹار ہریتھک روشن بھارتی فلم نگری کے صف اول کے اداکار ہیں جن کی فلمیں کروڑوں کا بزنس کرتی ہیں جب کہ وہ اپنے ڈانس اور ایکشن کے حوالے سے شہرت رکھتے ہیں تاہم اب دبنگ خان کے بعد بالی ووڈ ایکشن ہیرو بھی ہالی ووڈ کے ایکشن ہیرو سیلویسٹر اسٹالون کے مداح نکلے ہیں۔


سماجی رابطے کی ویب سائٹ ٹوئٹر پر اپنے مداح کے جواب میں ہریتھک روشن کا کہنا تھا کہ میں ہالی ووڈ سپر اسٹار سیلویسٹر اسٹالون کا سب سے بڑا مداح ہوں اسی لیے ان سے بطور بالی ووڈ اسٹار نہیں بلکہ سچے مداح کے طور پر ملنا پسند کروں گا۔

واضح رہے کہ بالی ووڈ اسٹار ہریتھک روشن اپنی نئی آنے والی فلم''موہن جودڑو'' کی شوٹنگ میں مصروف ہیں۔