صبح نو ٹینس نومی قمر نے مینز سنگلز ٹائٹل جیت لیا

نومی قمر نے صبح نو ٹینس چیمپئن شپ کا مینز سنگلز ٹائٹل جیت لیا، بدھ کو کے ایم سی اسپورٹس کمپلیکس کراچی میں کھیلے گئے فائنل میں انھوں نے سید زوہیر رضا کو باآسانی مقابلے کے بعد7-5,6-2 سے شکست دی۔


میچ میں نومی نے اپنے ماضی کے شاندار کھیل کی جھلک پیش کی، دیگرکیٹیگریز کے فائنلز جمعے کو ہوں گے۔بوائز انڈر18 کے سیمی فائنل میں داور ریحان نے سخت مقابلے کے بعد مراد خان کو 6-4, 7-6(7-4) سے شکست دی،عقیل شبیر کو مارب ملک سے مقابلے میں 6-4, 6-2کی آسان فتح نصیب ہوئی، داور ریحان نے بلال عمران لویا کو 6-2, 6-0 سے شکست دے کر بوائز انڈر14 فائنل کیلیے بھی کوالیفائی کرلیا، فائنل میں ان کا مقابلہ مارب ملک سے ہوگا جنھوں نے سیمی فائنل میں ایم رضا سوانی کو 6-3, 6-3 سے قابو کیا، سوانی اچھا مقابلہ کرنے کے باوجود میچ جیتنے میں ناکام رہے۔ لیڈیز سنگلز کے کوارٹر فائنلز میں ماہین دادا نے کنزہ گھانچی کو6-0,6-0 سے مات دی، ہانیہ نوید نے نیہا خان کو6-0, 6-0 سے زیر کیا۔