کرن جوہر نے دبنگ خان کو فلم ’’شدھی‘‘ کے لیے کاسٹ کرلیا

MIRANSHAH:
نامور فلمساز کرن جوہر نے بالی ووڈ کے دبنگ سپر اسٹار سلمان خان کو اپنی نئی آنے والی فلم ''شدھی'' میں کاسٹ کرلیا۔

بالی ووڈ فلمساز کرن جوہر کی فلم ''شدھی'' کے لیے ایکشن ہیرو ہریتھک روشن اور کرینہ کپور کا نام لیا جارہا تھا جس کے بعد فلم کے لیے دبنگ خان کو آن بورڈ کیا گیا لیکن کرن جوہر اور سلو میاں کے درمیان تلخیوں کے باعث فلم میں نوجوان اداکار ورن دھون اور عالیہ بھٹ کو مرکزی کردار کے لیے فائنل کیا گیا تھا تاہم اب ایک بار پھر فلم پروڈیوسرز نے سلو میاں کو فلم میں کاسٹ کرلیا ہے۔


میڈیا رپورٹس کے مطابق کرن جوہر اور پروڈیوسر رونی اسکرو والا نے اپنی نئی آنے والی فلم ''شدھی'' کے لیے دبنگ خان کو پیشکش کی جس پر سلومیاں نے فلم میں کام کرنے کی حامی کرلی ہے جس کے بعد اب سلمان خان اور کرن جوہر 18 سال کے طویل وقفے کے بعد ایک ساتھ کام کریں گے جب کہ کرن جوہر اور دبنگ خان میں اختلافات دور کرنے میں فلمساز رونی نے اہم کردار ادا کیا ہے۔

واضح رہے کہ بالی ووڈ اسٹار سلمان خان نے 1998 میں ریلیز ہونے والی کرن جوہر کی فلم ''کچھ کچھ ہوتا ہے'' میں ایک ساتھ کام کیا تھا۔