سی آئی ڈی نے ٹارگٹ کلر گرفتار کرلیا دستی بم برآمد

سی آئی ڈی گارڈن پولیس نے شیر شاہ سے مبینہ ٹارگٹ کلر کو گرفتار کر کے اسلحہ اور دستی بم برآمد کرلیا۔جبکہ پولیس نے مختلف علاقوں سے9 ملزمان کو گرفتار کر کے اسلحہ ، موٹر سائیکل اور چرس برآمد کرلی۔


تفصیلات کے مطابق ایس ایس پی سی آئی ڈی انسداد انتہا پسندی سیل گارڈن چوہدری اسلم نے پولیس پارٹی کے ہمراہ شیرشاہ میں چھاپہ مار کر ٹارگٹ کلنگ کی7 وارداتوں میں ملوث مبینہ ٹارگٹ کلر علی اصغر کو گرفتار کر کے ٹی ٹی پستول اور دستی بم برآمد کرلیا ، چوہدری اسلم کے مطابق گرفتار ملزم کا تعلق سندھ کی ایک لسانی جماعت سے ہے اور اس نے دہشت گردی کی تربیت پنجگور بلوچستان سے حاصل کی ہے،ملزم اصغر علی نے دوران تفتیش انکشاف کیا اس نے الفلاح تھانے کی حدود میں حنیف شیخ ، شہزاد شاہ اور منصور کو فائرنگ کر کے قتل کیا تھا۔

جبکہ ملزم نے بتایا کہ اس نے ان کے علاوہ دیگر 4 افراد کو بھی قتل کیا ہے جن کے بارے میں اسے معلوم نہیں، پولیس کا کہنا ہے کہ ملزم قتل اور دیگر وارداتوں میں پولیس کو مطلوب تھا ، ایسٹ زون پولیس نے جرائم پیشہ عناصر کے خلاف جاری مہم میں 2 مفرور وںسمیت 8 ملزمان کو گرفتار کر کے 3 موٹر سائیکلیں اور 2 ٹی ٹی پستول برآمد کرلیں جبکہ مومن آباد پولیس نے فقیر کالونی سے منشیات فروشی میں ملوث عمران کو گرفتار کر کے ٹی ٹی پستول اور 2 کلو چرس برآمد کرلی ہے۔