وزیراعظم تیزی سے صحت یاب ہورہے ہیں انہیں آج کمرے میں منتقل کردیا جائے گا مریم نواز

وزیراعظم کی صاحبزادی مریم نواز کا کہنا ہے کہ وزیراعظم نواز شریف کے گلے میں سوزش کی وجہ سے بولنے میں تکلیف ہورہی ہے لیکن وہ تیزی سے صحتیاب ہو رہے ہیں جو کہ انتہائی شکر کے لمحات ہیں۔

سماجی رابطے کی سائٹ ٹوئٹر پر نواز شریف کی صاحبزادی مریم نواز نے اپنی ٹوئٹ میں بتایا کہ صبح میری اپنے والد سے بات ہوئی تاہم گلے میں سوزش کی وجہ سے انہیں بولنے میں تکلیف ہورہی تھی لیکن وہ تیزی سے صحت یاب ہو رہے ہیں جو کہ انتہائی شکر کے لمحات ہیں۔ ان کا کہنا تھا کہ صبح 2 سرجنز نے نواز شریف کا چیک اپ کیا اور ان کے سینے سے 2 ٹیوب نکال دی گئی ہیں جس سے وہ کافی آرام محسوس کررہے ہیں جب کہ ان کا آپریشن کرنے والے سرجنز وزیراعظم کی صحت یابی پر بہت خوش ہیں۔

مریم نواز نے کہا کہ وزیراعظم نوازشریف مزید 24 گھنٹوں کے لیے آئی سی یو میں رہیں گے جس کے بعد انہیں کمرے میں شفٹ کر دیا جائے گا۔