دفاعی ہتھیاروں کی نمائش آئیڈیازکے 80 فیصد اسٹالز بک

دفاعی ہتھیاروں کی 9 ویں بین الاقوامی نمائش و کانفرنس ''آئیڈیاز 2016'' کے انعقاد کی بھرپور تیاریاں جاری ہیں، یہ نمائش و کانفرنس کراچی ایکسپو سینٹر میں 22 سے 25 نومبر 2016کو منعقد ہوگی۔ نمائش کی تیاریوں کے سلسلے میں اسٹیئرنگ کمیٹی کا دوسرا اجلاس جمعرات کو کراچی ایکسپو سینٹر میں منعقد ہوا جس میں اہم اراکین اور اسٹیک ہولڈرز نے شرکت کی اور نمائش کے بھرپور انعقاد کے لیے اب تک ہونے والی پیشرفت کا جائزہ لیا گیا۔


اسٹیئرنگ کمیٹی کے اجلاس کی صدارت کرتے ہوئے ڈیفنس ایکسپورٹ پروموشن آرگنائزیشن (ڈی ای پی او) کے ڈائریکٹر جنرل میجر جنرل آغا مسعود اکرم نے بتایا کہ آئیڈیاز 2016 میں شرکت کے لیے مقامی اور دنیا بھر کے غیرملکی نمائش کنندگان کی جانب سے بھرپور رسپانس مل رہا ہے اور آئیڈیاز 2016 نمائش کے لیے 80 فیصد اسٹالز بک ہوچکے ہیں، دنیا میں پاکستان کی مثبت تصویر پیش کرنا اس نمائش کے بنیادی مقاصد میں سے ایک ہے۔

انہوں نے شرکا پر زور دیا کہ وہ نمائش کے بھرپور انعقاد کے لیے اپنا تعاون بڑھاتے ہوئے دنیا میں پاکستان کی مثبت ساکھ اجاگر کرنے کے لیے اپنا کردار ادا کریں۔اجلاس کے دوران متعلقہ اداروں کے نمائندوں نے اپنی ذمے داریوں کی ادائیگی سے متعلق پیشرفت کے بارے میں پریزنٹیشنز پیش کیں۔